«كلام يهمك».. تفكير الراجل والست

تفكير الراجل والست والفرق بينهما، اللي بيعمل مشاكل كتير جدًا، كل واحد فيهم مستغرب أن الطرف الثاني مبيفكرش زيه، لدرجة إن في كاتب اسمه "د\جون جراي" عمل كتاب تخيل  فيه إن الرجال من كوكب المريخ والنساء من كوكب الزهرةوسماه "الرجال من المريخ والنساء من الزهرة". لأن كل واحد منهم شايف الثاني كائن غريب عنه، هنعرف اذاي " كلام يهمك".

تعالوا نبدء الحكاية من الأول ونشوف تركيبة مخ الراجل و تركيبة مخ الست عشان في اختلافات جينية بينهم، يعني مثلا في المخ فصين فص أيمن وفص أيسر ويربطهم ألياف عصبية، هتقولى يعني أيه،هقولك إن الفص الأيمن مسئول عن العاطفة، الأحاسيس، مسئول عن الإبداع، الإيقاع، مسئول عن الفلسفة، والمشاعر، يهتم بالصورة العامة عشان كدة سموه "الفص العاطفي".

أما الفص الأيسر فهو عكسه تمامًا هو مسئول عن المنطق، الحسابات العقلية، مراكز القراءة الكتابة والتحدث، هو بيتعامل مع الحقايق العلمية والنظرية، هو اللي بيخطط كمان، هو عملي جدا وعشان كدة سموه " الفص المنطقي"وزى ما قولنا أن الفصين دول بيربطهم ألياف عصبية فلقوا إن الألياف ديه موجودة أربع أضعاف عند الست عن الرجل،مثلا لو تعرض الرجل والست للتفكير في أمر منطقي أو عاطفي هتلاقي الرجل بيستخدم الفص الأيمن أوالأيسر، أما الست فبستخدم الأتنين مع بعض في وقت واحد.

طيب دة معناه أيه برده مش فاهم، هقولك مثلاُ تعالو نشوف مع بعض ليه الست بتتكلم كتير و الرجل لأ ، لأن الست بتتكلم لأسباب تانية خالص غير أسباب الرجل، الست بتبني علاقتها باللي حواليهاعن طريق الكلام  لإنها بكدة بتوصل لصحبتها أو قريبتها أو أي حد بتكلمه انها مهتمه بيه، فهي بتتكلم لمجرد انها عاوزة تتكلم وتعبر عن أحاسيسها ومشاعرها للناس اللي حواليها، مش مهم ابدًا قيمة الموضوع أوالمحتوى،كمان معدل الكلمات وتنوع الألفاظ تقريبا ضعف معدل الراجل، عشان كدة تقدر تتكلم لفترات طويلة في مواضيع ملهاش علاقة ببعض عشان هي بتستخدم الفصين الايمن والأيسر زي ما قولنا في الأول.

نيجي بقى نشوف الراجل، الراجل بيتكلم بس لما يكون في سبب يتكلم عشانه، يعني عاوز حاجة من حد، أو عاوز يسأل عن حاجة ولو مفيش، خلاص الموضوع انتهى بالنسبة له، وتلاقيه سكت لأنه مبيقدرش يشغل الفصين مع بعض، يا إما الأيمن العاطفي أو الايسر المنطقى فبيكون محدد وواضح ومحدد هدفه من الكلام،فطبعا الراجل بيلاقي الست عمالة تتكلم عن حاجات غريبه  "من وجهة نظره طبعا" مش عارف الممثلة كانت لابسة أيه أو بنت خالتها اللي كانت في الفرح بتتكلم أزاى، وبيكون طبعا مذهول من قدرة الست على الكلام لفترة طويلة في موضوع واحد، وهو المسكين بيدفع الفاتورة في الأخر، أما الست شايفاه أخرس ومبيعرفش يعبر عن مشاعره.

تعالو ندخل على موضوع تاني غريب وهو أذاي الست بتقدر تعمل أكتر من حاجة في وقت واحد يعني ممكن تتكلم في التليفون وبتذاكر للولاد والأكل يكون على النار، سوبر وومان يعنى، أما الرجل ميقدرش يركز في أكتر من حاجة في نفس الوقت ،لأن الست تركيبة مخها "حلزوني" يعنى ممكن تفكر في أكتر من حاجة في وقت واحد أما الراجل تركيبة مخه "تسلسلي" يعني يفكر في حاجة يخلصها وبعدين يفكر في اللى بعدهاعشان كدة لو الراجل مركز في حاجة مثلا الموبايل، بيتابع مسلسل، بيقرا حاجة والست جت سألته عن أي حاجة مش هيرد أو هيرد من غير تركيز لكن العكس ممكن لو الست بتعمل أكتر من حاجة والراجل جه سألها هو القميص الأبيض فين علطول تقوله في أخر الدرج اليمين اللي في دولاب أوضة الولاد مثلاً.

وعلى فكرة لولا كدة كانت الست معرفتش تكون أم وزوجة وأحيانًا كمان بتشتغل، بجد شابوووووو لكل ست بتشتغل وتتعب برة البيت وغير كدة جوة البيت أم وزوجة قايمة بكل واجباتها، المشكلة هنا بتحصل لأنها عاوزاه زيها يرد ويعمل اكتر من حاجة، وهوحاسس انها مش مهتمة بيه مش مركزة معاه، لأن لما حد بيسأله على حاجة أو يطلب منه حاجة أو حتى يتكلم معاه عادى بيكون مركز معاه بكل تفكيره، فلما يجي يتكلم او يسالها يلاقيها بتعمل كذا حاجة وبترد عليه فبيشوف دة استهتار وعدم تقدير، وهي لما تكون عاوزة تكلمه في اكتر من حاجة في نفس الوقت وتلاقيه يرد على اول حاجة والباقي يضيع منه بتفهم دة عدم اهتمام وانه مش مركز معاها ومش بيحبها، وتبدأ المشاكل، لحد هنا لسة المشاكل مظهرتش أوى.