"تريندات السوشيال ميديا" بعد مباراة الأهلي والإسماعيلي.. وليد سليمان يحتل الصدارة

يتصدر نجم النادي الأهلي "وليد سليمان" حالياً تريندات مواقع التواصل الاجتماعي بعدما سجل هدف النادي الأهلي الوحيد أمام النادى الإسماعيلي، في المباراة التي جمعتهم اليوم في إطار الجولة التاسعة من بطولة الدوري المصري الممتاز ، والتي أقُيمت على أستاد حرس الحدود بالمكس. حل "سليمان" بديلاً للمهاجم "مروان محسن " وسجل هدف اللقاء في الدقيقة 78 من المباراة، ووصل إلى الهدف الخامس له في بطولة الدوري موسم 2019 /2020. يحتل اسم " وليد سليمان" مرتبة متقدمة على موقع التدوينات العالمي "تويتر" ، منذ نزوله بديلاً في الدقيقة 67، إلى الآن من جانب محبي النادى الأهلى بشكل عام و" وليد سليمان" بشكل خاص، وفي السطور التاليه نستعرض ابرز تغريدات جمهور "المارد الأحمر" علي هدف حاوي النادي الأهلي "وليد سليمان". وكتب هشام: "‏مفيش مره حطينا عشمنا ف وليد سليمان واحتجناه غير ونزل وقلب نتيجه الماتش وكسبنا ٣ نقط ، وليد سليمان جايز ميكونش قادر يلعب ٩٠ دقيقه دلوقتي بس هيفضل اكتر لاعب من الجيل الذهبي هنندم عليه هو واحمد فتحي". وعلقت منة حمادة: "‏وليد سليمان الذهب الذي لا يصدأ ربنا يحميك لينا يا ابو سليم يا نجم، وليد سليمان خاتم سليمان". ونشر عبدالقادر: "‏وليد سليمان كبير المعلمين في الأهلي حط الكورة زي ما الكتاب بيقول، أحد أخر الباقين من جيل تريكه ادانا واحدة من لمحاته.. وطبعاً العرضية تستاهل كلام كتير حلو أوي على محمد هاني". وقال محمد صبحي: " ‏وليد سليمان نازل يكسب أي إلتحام هيدخله، كسبه او لأ برده مش دي القضية بس بيحاول، مش نازل يحسس على لاعيبة المنافس عشان يعمل نفسه بيضغط وبيلتحم.. نازل يكسب ونازل عشان الأهلي يكسب، وليد سليمان ابن الأهلي حتى لو مش من ناشئين الأهلي و أهم و أرجل لاعيب دخل النادي بعد الجيل الذهبي". وأضاف أيضاً" ‏جايز بقى أقل بدنيًا، جايز مبقاش يقدر يلعب 90 دقيقة، جايز مبقاش يقدر يلعب جناح خط زي زمان.. بس في حاجات كدة في الملعب بتبقى مش محتاجة أكتر من شوية إحساس، شخصية، لامؤاخذة رجولة.. وليد سليمان لما بتجيله الكورة قدام الجول بيلعبها ع الجول، دخلت او لأ مش دي القضية بس بيلعبها ع الجول". ونشر hamo" ‏العدل في الكورة إن وليد سليمان بموقفه مع ألاهلي ايام انتقاله من انبي و ظهوره بالمستوي دا مع الفريق في كل مراحل المختلفة إنه يتعامل معاملة العظماء، من 2011 لحد دلوقتي عمر ما الاهلي اتزنق في ماتش او في فترة في بطولة وملقتش وليد سليمان ظهر بكامل قوته ورجولته وشال الفرقة على كتفه". ‎ بفوز النادي الأهلي اليوم علي الإسماعيلي ، رفع رصيده إلى 21 نقطة متصدراً جدول ترتيب الدوري المصري بالعلامة الكاملة، بينما إستمر النادي الإسماعيلي في المركز السادس برصيد 13 نقطة.

أسماء سعداوي