رياضة
الظهور الأول لمدحت شلبي في الدوري السعودي.. وفضايح وأسرار أوضة اللبس بالزمالك
والأهلي يرد على المشككين في بيبو.. وإمام عاشور يستفز جماهير القلعة البيضاء
الظهور الأول لمدحت شلبي بالدوري السعودي، وفضايح وأسرار أوضة اللبس في الزمالك، والأهلي يرد على المشككين في بيبو، وإمام عاشور يستفز الجماهير البيضاء، ومحمد صلاح خارج نطاق الخدمة، وطارق حامد حط نيمار ف الشنكار، كل ده وأكتر في نشرة أخبار الوكالة
يخرب عقلك يا مدحت يا شلبي
النهاردة هيكون الظهور الأول لمدحت شلبي كمعلق على مباراة نادي النصر والأهلي في قمة الدوري السعودي، اختيار مدحت شلبي جيه بعد تفكير كبير جداً من المسؤلين السعوديين الي قرروا أنهم يخلوا الدوري عندهم كامل مكتمل من كل النواجي من حيث التسويق والنجوم العالمية وتوفير متعة للمشاهد في البيت زي الي في الملعب بالظبط، الجمهور السعودي على تويتر متشوق جداً أنه يسمع مدحت شلبي وده ظهر من خلال التغريدات بتاعتهم من ساعة من انضم لجموعة القنوات الرياضية السعودية، ومش الجمهور السعودي ده الجمهور العربي عايز يعرف ازاي شلبوكا هيقدر ينطق اسماء اللاعيبة ديه كلها، ادينا هنشوف.
نيمار في الشنكار
نال طارق حامد متوسط ميدان فريق ضمك السعودي، إشادات كبيرة بعد ما ساهم بشكل كبير في خروج لقاء فريقه الجديد أمام نادي الهلال بالتعادل الإيجابي 1-1، طارق حامد شارك بشكل أساسي في المباراة كاملة وقلل من خطورة نيمار، وطلع بعض الجمهور واطلق هشتاج نيمار في الشنكار، كمان المسمار زي ما جمهور الزمالك بيحب يلقبه قدر أنه يوقف خطورة البرازيلي مالكو وعمل تدخلات كويسة جداً وفاز في كل الالتحمات الي خضاها ضد لاعيبة الهلال، ونال إشادات كبيرة جداً من كل المحللين والجمهور السعودي.
أوسوريو يفضح لاعبي الزمالك
خوان كارلوس أوسوريو المدير الفني لنادي الزمالك بقى غريب جداً في تصرفاته الفترة الي فاتت يعني يطلع يهاجم لاعيب يقول ان في بعض اللاعبين معندهمش جودة في الاداء، لكن تصريحة الغريب كان مع صحيفة ماركا الإسبانية الي قال فيها أن في لاعيبة بتشيش غير انهم بيشيشوا بقى بالبلدي كدا، لا ده كمان بيسهروا وده بيأثر على مستواهم، بعد المؤتمر الصحفي في لماتش بيراميدز قال ان مقصدتش اللاعيب المصري بالتحديد،، لكني قولت التصريح ده في المطلق، بيحاول يهرب من كارثة عملها وسببها للاعيبة.
إدارة الزمالك تحذر أوسوريو
بعد تصريحاته في المؤتمر الصحفي لماتش بيراميدز بعض من مسؤلين الزمالك تواصلوا مع أوسوريو وقالولهخ مينفعش أنك تقول حاجة زي كدا خصوصاً وأن في بعض المترصدين للفريق واللاعيبة على أي غلطة صغيرة، رد أوسوريو أنه قال واقع وانه محددش اسماء وانه متأكد أن هناك لاعيبة في الفريق بتشرب شيشة غير كدا أنه حابب يجتمع بأسرع وقت مع مجلس الإدارة لتحديد موقفه.
موقف أوسوريو من الأستمرار مع الزمالك
أوسوريو في الوقت الحالي مستمر مع الزمالك لحد ما إدارة جديدة مستقرة ومنتخبة تيجي وده مش بعيد يعني يوم 20 أكتوبر كله هيتحدد من البداية للنهاية، وطبعاً زي ما احنا عارفين في غضب كبير من مستوى الفريق الأبيض خلال الفترة الي فاتت والجماهير طالبت برحيل أوسوريو أكتر من مرة، لكن الظروف في الوقت الحالي مش هتسمح بأـنه يمشي إطلاقاً.
إمام عاشور يستفز جمهور الزمالك
بعد نهاية مباراة بيراميدز والزمالك بتعادل الفريقين 2-2، نشر إمام عاشور ستوري غريبة على إنستجرام لواحد بيرسمه، جمهور الزمالك وبشكل غريب اخدها في سكة الأستفزاز لأنه نشرها بعد دقائق قليلة من تعادل الفريق الأبيض.
جلسة عاجلة بين بيبو وكولر
في جلسة جمعت مارسيل كولر المدير الفني للنادي الأهلي بخالد بيبو عشان يبتدوا يحطوا مع بعض القواعد والقوانين الي هيمشي عليها الفريق خلال الفترة الي جاية، وأكد كولر لبيبو أنه بيدعمه بشكل كبير، وأنه محتاج دوره يكون أكبر مع اللاعبين خلال الفترة الي جاية خصوصاً وأن آثار خسارة السوبر الإفريقي لسه موجودة ودوره انه يطلع اللاعبين من الحالة النفسية الي هما فيها.
الأهلي يعد سلاحه الفتاك استعداداً للفترة المقبلة
ابتدى النادي الأهلي في إعداد المهاجم الفرنسي أنتوني موديست وده بعد تأكميد عدم مشاركته في مباراة سان جورج الإثيوبي، بسبب عدم قيده في قائمة الفريق الإفريقية الثانية، كولر استغل ده وحط برنامج إعداد بدني قوي للفرنسي عشان يعده للمباريات الي جاية سواء في بطولة دوري الأبطال أو دوري السوبر الإفريقي والبطولات الي الأهلي هيلعبها خلال الموسم ده.
محمد صلاح خارج الخدمة
يورجن كلوب خلى محمد صلاح يبدأ احتياطي في مباراة لاسك لينز في بطولة الدوري الأوروبي، المباراة الي دخل فيها صلاح كبديل وصنع هدف وسجل هدف وقدر انه يخرج منتصر بالريدز من لقاء صعب جداً كان متأخر فيه بهدف، شكل كدا العلاقة بين صلاح وكلوب وصلت لطريق مسدود خصوصاً أن في تجاهل من الألماني لصلاح على المستوى الفني، فهل صلاح هيمشي خلال الفترة الي جاية ولا هيفضل مكمل مع الريدز.
