السيسي: الله حمى مصر وفيه بلاد بقالها 20 سنة غير قادرة على العبور

أكد الرئيس عبد الفتاح السيسي، أن الدولة المصرية جزء من الاقتصاد العالمي، متابعا: "احنا جزء من الاقتصاد العالمي.. هو أنتوا مش بتسمعوا في الأخبار، سواء جورنال أو في التليفزيون أن فيه اقتصادات كبيرة بتعاني وتتأثر.. ومش هذكر أسماء.. وفيه دولة كبيرة معرضة أنها مش تدفع الدين الحكومي بتاعها.. مش بتسمعوا ده.. ده حاجة".

وأضاف الرئيس السيسي، خلال كلمته في احتفالية عيد الشرطة الـ 71: "مؤسسات التمويل الدولية.. صندوق النقد الدولي.. وتداعيات الأزمة العالمية تؤثر على الاقتصاد العالمي.. بقول الكلام ده.. ماشيين في طريقنا.. وصامدين.. احنا جزء من الدنيا ومش منفصلين عنها".

وتابع الرئيس السيسي: "شوفوا اللي بيتكلموا.. اللى عندهم الظروف دي فى دول جنب مننا.. وبعضهم من 20 و30 سنة ومش يتجاوزها حتى الآن.. مش هقول أسماء دول.. ومش طبيعتنا نزعل أو نسئ.. بقالهم 20 سنة.. طب انت ازاي خلصت ازاي.. تقفوا وتفكروا ازاي ده حصل.. بالله.. بالله.. بالله".

السيسى: ثقتى فى الله مطلقة بأننا سنعبر الأزمة الاقتصادية 

 قال الرئيس عبد الفتاح السيسي، إن تحقيق الآمال، يتطلب جهدًا وصبرًا وقوة تحمل أو بكلمات أخرى، يتطلب روح التحدي المصرية الخالدة التي عبرت عنها، أحداث الخامس والعشرين من يناير عام 1952 وتجلت مرات عديدة في أحداث تاريخية أخرى في الماضي البعيد والقريب كان المصريون فيها دائمًا، على مستوى التحدي، وقادرين على هزيمته بل وقهره.

وأضاف الرئيس السيسي، خلال كلمته في حفل عيد الشرطة الـ 71: "ثقتي في الله، وفى شعب مصر مطلقة بأننا سنعبر، ونتجاوز الأزمة الاقتصادية العالمية وآثارها علينا، بالعمل المخلص، والجهد الذي لا ينقطع، والإيمان بأن الله "لا يضيع أجر من أحسن عملًا"، وأننا قادرون على بناء وطن، يحقق آمالنا في الحياة الكريمة، والتقدم والازدهار.

وقال الرئيس السيسي، في نهاية كلمته: "أشكركم جزيلًا، وكل عام وأنتم بخير وصحة وسلام، وهيئة الشرطة في تقدم ونجاح، في خدمة الشعب والوطن وبشعبها العظيم.. تحيا مصر.. تحيا مصر.. تحيا مصر".

مبررات علمية فى اللى بنعمله

وتحدث الرئيس عبدالفتاح السيسي عن تطوير قطاع الكهرباء والطاقة خلال احتفالية وزارة الداخلية بعيد الشرطة الـ 71 قائلا: "هل يا ترى المشاريع دي كانت ممكن متتعملش ولا كان لازم تتعمل؟ مبخشش في تفاصيل كتير، علشان نطور قطاع الطاقة والكهرباء مكنش الهدف بس إن إحنا ننشأ ونعمل محطات طاقة جديدة لا كان لابد من تجديد الشبكة واعمل شبكة إضافية طيب ده كافية؟ أضفنا ضعف حجم الشبكة القديمة الموجودة في مصر مرتين.

أضاف الرئيس السيسي: "بتقول عاوز تبقا أنت محور ومركز للطاقة الكهربائية في منطقتك طيب إزاى تعمل ده والشبكة عبر الكهرباء غير مؤهلة على نقل الكهرباء على الإطلاق علشان نعمل ده كان لازم يبقا موجود كمية طاقة كهربائية وشبكة ومحطات ومحولات للتحكم بشكل متكامل حتى لما أجي أقول عاوز أعمل طاقة جديدة ومتجددة مكون الكهرباء في مصر كان لا يمكن نقدر تشغل وتعمل محطات طاقة جديدة ومتجددة.. كان مطلوب مننا نعمل كل ده في فترة زمنية قليلة".

واصل الرئيس السيسي: "محطات التحكم عملنا جزء وفاضل التلتين تقريبا تخلينا الشبكة المصرية قادرة على التفاعل مع شبكات متقدمة جدا في أوروبا طيب بنعملها علشان نباهي لا دي متطلبات العمل بتحتاج كده..في كل موضوع هتجد مبررات  علمية واقتصادية مش مبرات سياسية ولو متعملتش يبقا احنا قصرنا في حق البلد دي وفى حق مستقبلها".

تابع الرئيس: "اللى بيكلمك بيكلمك في جزئية صغيرة لانه الهدف منه انه ياخدك في مكان تاني خالص ميخلكش ابدا تفكر ابدا بمنطق او علم هدفه كده طيب ليه ؟ هتفضل الدولة دي مستقرة بعد كل المحاولات اللى اتعملت خلال السنين اللى فاتت مش معقول".

مصر محمية بفضل الله وشعبها

وقال الرئيس عبد الفتاح السيسي، إن مصر محمية بفضل الله سبحانه وتعالى وشعبها، وأوضح: "كنا كلنا بنبكي أحيانا ونتألم أحيانا كثيرة لما كان بيقولك هاجموا واستشهد كتير على مدى السنوات السابقة، ودعنا الأيام دي بفضل الله سبحانه وتعالى".

وأكمل الرئيس في كلمته باحتفالية عيد الشرطة الـ 71 بأكاديمية الشرطة: "زي ما الأزمة الاقتصادية بتمس العالم كله وتضر العالم كله، نحن مضارين منها، طيب نصمد لها ولا؟ بالمناسبة أنا ليا عتاب على الإعلام.. أنتو ليه بتصوروا المصريين على إنهم مرعوبين على الأكل والشرب.. مايصحش.. والله ما يصح إنك تبينا إننا مرعوبين على الأكل والشرب.. لأ مايصحش كده وكأن آخر الدنيا، وأنا مش بقول إن ده كلام مش صحيح.. لأ.. بس بقول مش ده آخر الدنيا في مصر".

وتابع: "إحنا بنقول للشعب المصري إن الدولة دي هتبقى وتظل وتستمر وتكبر بينا كلنا وبتضحياتنا، واللي من ضمنها دي.. تضحية الظروف دي اللي إحنا ماعملنهاش، أنتو عارفين يعني إيه وزارة الداخلية تحبط نزول بـ7 أو 8 مليار جنيه ولا أكتر مخدرات في البلد، ده خطير جدا، أولادنا وبناتنا ممكن يتأذوا بالكلام ده، وموضوعات أخرى كتير جدا أجهزة الدولة بتقوم بيها، أنت بتتكلم في دولة فيها 105 مليون و6 أو 7 مليون ضيوف عندنا، أرجو أننا كمفكرين ومثقفين وإعلاميين ومسئولين، أن نجتهد في المرحلة الحاسمة التي نمر بها حتى نعبر منها بأمان وسلام إن شاء الله".

واقع مصر وظروفها تحتم علينا تحقيق قفزات تنموية 

وقال الرئيس عبد الفتاح السيسي، إن واقع مصر وظروفها الاقتصادية والسكانية، يحتمون علينا أن نقفز قفزات تنموية هائلة، في وقت قصير فنحن في الحقيقة، في سباق مع الزمن، لتجاوز مخاطر وتداعيات الانفجار السكاني.

وأضاف الرئيس السيسي، خلال كلمته في احتفالية عيد الشرطة الـ 71: "المشروعات التنموية الكبرى، التي تنفذها الدولة، لا تهدف للتفاخر أو التباهي وإنما لتأسيس البيئة الاستثمارية والبنية الأساسية اللازمة، لتحقيق التنمية الاقتصادية الشاملة، التي ترفع مستوى معيشة جميع أفراد الشعب".

محاولات لتضليل الناس

وتحدث الرئيس عبد الفتاح السيسي، عن الدعاوي المضللة فيما يتعلق بالأزمة الاقتصادية، قائلا: "اسمحولى إننا أمام بند واحد أو بندين أتحدث فيه باختصار.. هتكلم عن ما يتردد إن الأزمة الموجودة بسبب المشروعات القومية، طيب هسأل بالإضافة إلى الأسئلة العامة يا ترى هل كان ممكن قناة السويس اللى كان دخلها 4.5 مليار دولار في أحسن الأحوال ميتمش تطويرها، ويجي بعد سبع سنين ويكون دخلها وصل إلى 8 مليار دولار؟..هل كان ممكن نتجاوز ومنطورش القناة ومنستفدش من الرقم اللى موجود أمامنا دلوقتي ..موضوع الدراسات كانت تستهدف الوصول إلى 10 او 12 مليار دولار سنويا..هل الرقم ده جمب رقم تطوير القناة يعتبر رقم كبير؟".

وأضاف الرئيس السيسي خلال الاحتفال بعيد الشرطة الـ 71: "هل كان يمكن الازمة الكهرباء والطاقة كلنا كنا شايفيناها بس مش عاوزين ننساها.. 1.5 تريليون جنيه للكهرباء .. هل كان ممكن الدولة المصرية تستمر خلال سبع سنين اللى فاتت واحنا زدنا 14 مليون ومن 2011 زدنا 20 مليون هل كان يمكن واحنا عندنا ازمة كهرباء منعملش تطوير البنية الأساسية للكهرباء.. بتكلم في اسئلة واضحة جدا لان هناك محاولات دايما لتضليل الناس وياخدوهم في حتة تانية خالص عندي ثقة في الناس والشعب المصري إنه فاهم ده وشايفه.. بس بأكد عليه".