ريم مصطفي تتصدر التريند بسبب تصريحاتها «اتجوزت ١٩ سنة وعندي ولدين»

تصريحات الفنانة ريم مصطفي.. تصدرت الفنانة ريم مصطفي تريند موقع بحث جوجل العالمي خلال الساعات القليلة الماضية، وذلك بعد حديثها خلال مداخلة هاتفية لبرنامج «كلمة أخيرة» الذي تقدمه الإعلامية لميس الحديدي على إحدى القنوات الفضائية قناة ON.

ريم مصطفي تتصدر التريند 

ونستعرض لكم خلال التقرير التالي أبرز تصريحات الفنانة ريم مصطفي خلال مداخلة هاتفية لبرنامج «كلمة أخيرة» الذي تقدمه الإعلامية لميس الحديدي على إحدى القنوات الفضائية قناة ON، اليكم التفاصيل:

تصريحات الفنانة ريم مصطفى في برنامج كلمة أخيرة

قالت ريم مصطفي: ملابس «الفورمال» في «سوتس بالعربي» كان موترني لكن حبيته وعشت جوه الشخصية وكلنا كنا حلوين وأول مرة ألبس كده في أدواري، أنا شخصية في الطبيعة بحب ألبس لبس رياضي».

ريم مصطفي: الناس بتتخدع في شكلي الأشقر لكن أنا راجل في عيلتي

وتابعت الفنانة ريم مصطفي، حديثها قائلة «في نهاية الأمر عجبتني الحالة وبمجرد ما برتدي زي الشخصية بلبس الكاركتر على طول، بدخل جوه الشخصية وبقف قدام المراية وبعيش التفاصيل بصدق شكلها وده بيحصلي في كل الأدوار».

وأوضحت ريم: «أنا بشبه كاميليا في إن شخصيتي قوية والناس بتتخدع في شكلي وبيفكروني مدلعة لكن أنا راجل العيلة وأنشف من إخواتي البنات شوية، وأمي لما بتركب معايا العربية بتقولي حاسة إني راكبة مع ولد عشان سواقتي مش كيوت».

واضافت الفنانة ريم مصطفي، «بيفكروني عشان أنا شقراء أني هبقى شخصية مدلعة، وأنا مش مدلعة أنا وسط عيلتي راجل العيلة، وأنا ترتيبي الثاني، ولكني أعتقد إن الترتيب ليس له علاقة بقوة الشخصية، فالأمر في النهاية يتعلق بالكاركاتر، وأنا ناشفة عن إخواتي البنات شوية».

ريم مصطفى: انفصلت بعد زواج دام 10 أعوام وعندي ولدين

قالت الفنانة ريم مصطفى: مفيش راجل ومفيش حب دلوقتي في حياتي.. وكان فيه قبل كدة".

وأضافت ريم مصطفى: اخواتي متجوزين ما عدا أنا، وأنا اتجوزت قبل كدة واتطلقت وعندي ولدين عمر وعلي.

وتابعت: اتجوزت وأنا عندي 19 سنة، وفضلت متزوجة 10 سنين لحد ما اتطلقت .

واستكملت: التجربة دي كانت مهمة جدا لي في حياتي وعلمتني ان أهم حاجة تختاري شريك حياتك، وأبو ولادي راجل محترم، وطلاقنا كان بسبب اننا مختلفين عن بعض تماما.

ريم: بحب المطبخ وطباخة شاطرة

قالت: «أنا بحب الأكل جداً وبكره الدايت، بس في بعض الاوقات لما الدنيا بتبوظ ببدأ أركز إني أخلي بالي ورغم إني طويلة بس زيادة الوزن بتظهر عليا، وبلعب رياضة من وقت للتاني بدون انتظام خاصة لو فيه تصوير».

وتابعت ريم مصطفى، «أنا بحب أدخل المطبخ وبعمل أكل حلو جداً ولو دخلت المطبخ بليل ولقيت محشي في الثلاجة هاكله، ومش هيفرق معايا خالص، وبحب أطبخ جداً وبعمل كل الأكل اللي ممكن تتخيلوه أنا طباخة شاطرة حتى السي فود بعمله كويس»، وأكملت «أنا مقتنعة إن اللي بيحب الأكل لازم يعرف يطبخ»، ومازحتها الحديدي قائلة: «يا هناه يا سعده» متسائلة: «إيه تاني أسوأ حاجة بعد الدايت الرجالة؟ لتجيب مازحة: «مش بكرهم بس دمهم تقيل أنا حاسة إن الستات كائنات مختلفة اضطروا يتحطوا في كوكب فيتعاملوا مع بعض عشان كده بيحصل تصادم».